ИзборМКД

Денис Прешова избран за нов шеф на Делегацијата на РС Македонија во ГРЕКО

Проф. д-р Денис Прешова е вонреден професор на правниот факултет „Јустинијан Први“ при Универзитетот „Св. Кирил и Методиј“ во Скопје. Автор е на бројни стручни и научни трудови од областа на уставното право и политичкиот систем, а учествувал е и во многу проекти и активности како експерт по уставно право.

Од Triling Mk 105

Владата, на предлог на Министерството за правда, го избра Денис Прешова за нов шеф на Делегацијата на Република Северна Македонија во ГРЕКО (Групата на држави против корупција на Советот на Европа), информира министерот за правда Игор Филков на социјалните мрежи.

​Проф. д-р Денис Прешова е вонреден професор на правниот факултет „Јустинијан Први“ при Универзитетот „Св. Кирил и Методиј“ во Скопје. Автор е на бројни стручни и научни трудови од областа на уставното право и политичкиот систем, а учествувал е и во многу проекти и активности како експерт по уставно право.

„Со оглед на фактот што во рамките на ГРЕКО започна Шестиот круг на евалуација: ‘Спречување на корупција и промовирање на интегритет на локално ниво’ и имајќи предвид дека Република Северна Македонија веќе има најавена евалуација на оваа тема, ​проф. д-р Денис Прешова доаѓа во вистинско време на чело на националната делегација. Неговото познавање и експертиза во областа на уставното право и политичкиот систем ќе бидат клучни за успешната евалуација и одбрана на извештаите на ГРЕКО за Република Северна Македонија“, напиша Филков на Инстаграм.

ГРЕКО е антикорупциско мониторинг тело на Советот на Европа, со седиште во Стразбур, Франција. Основано е во 1999 година како проширен делумен договор од 17 земји-членки на Советот на Европа. Целта на ГРЕКО е да го подобри капацитетот на своите земји-членки за борба против корупцијата преку следење на нивната усогласеност со антикорупциските стандарди на Советот на Европа, преку процес на меѓусебна евалуација. ГРЕКО помага да се идентификуваат недостатоците во националните антикорупциски политики, со цел да се поттикнат неопходните законодавни, институционални и практични реформи.