Дендиас: Застојот на процесот на проширување на ЕУ го намали кредибилитетот на европскиот сон

Грција себеси се смета за мост меѓу североисточна Африка и Европа, а Балканот е токму продолжението на овој мост кон север. Оваа наша улога не треба да се заборави, порача министерот за одбрана на Грција Никос Дендиас, говорејќи на конференција посветена на Западен Балкан и истакна дека ЕУ интеграцијата на регионот „би можела да биде клучен момент во справувањето со безбедносните предизвици на Западен Балкан“, јави дописничката на МИА од Атина.

Дендиас посочи дека „лесно е да се потценат потенцијалните предизвици на Балканот поради двете војни на север и на југ, но низ вековите, Балканот се покажа како сила за целиот свет“ и нагласи дека за да постои стабилен систем во Европа, „не можеме да дозволиме да има „црни дупки“ во овој систем“.

-Заложбата на Европската унија за интеграција на овие земји е најнеопходното за долгорочен мир, стабилност и просперитет. Сепак, застојот, очигледниот застој на процесот на проширување го намали кредибилитетот на европскиот сон и се плашам дека дозволи надворешните актери да добијат влијание во општествата, особено во Западен Балкан, посочи министерот за одбрана на Грција.

Ја повтори грчката поддршка за ЕУ перспективата на земјите од регионот, споменувајќи ја солунската агенда од 2003 година, истакнувајќи дека „треба повеќе да се фокусираме на Западен Балкан“, но и дека постојат одредени предуслови.

-Треба отворено и искрено да зборуваме со владите и општествата на земјите од Западен Балкан. Можеме да им кажеме и мораме да им кажеме дека овој пат до заедничкиот европски сон минува низ порти. А овие порти се меѓународното право, договорите што се потпишани и добрососедските односи, како и почитувањето на владеењето на правото. Тие ќе мора да поминат низ овие порти. И треба да го сторат, не поради Грција или Европската Унија или Обединетите нации. Треба да го сторат бидејќи е во корист на нивните општества, во корист на народите. Токму тоа е она што го замислуваме како подобра иднина за секој граѓанин на Западен Балкан, истакна Дендиас.