Грција во периодот јануари – октомври ја посетиле над 35 милиони туристи

Приходите на Грција од туризмот забележале пораст од 8,9 отсто во периодот јануари-октомври, додека бројот на посетители е зголемен за 4,4 проценти, според информациите од Банката на Грција, како што јави дописничката на МИА од Атина.

Во овој временски период, остварените приходи изнесуваат 22,4 милијарди евра. Банката на Грција објаснува дека овој прилив се должи на зголемувањето на приходите од граѓани на земјите од Европската Унија за 5,8 отсто, но и на повисоките приходи од посетители од други држави, кои пораснале за 12,2 проценти.

Бројот на туристи што ја посетиле Грција од јануари до октомври исто така бележи раст од 4,4 проценти. Во споредба со претходната година, кога земјата била посетена од 33,8 милиони туристи, оваа година бројката достигнала 35,3 милиони.

Сообраќајот на патници, како преку аеродромските така и преку копнените гранични премини, покажува пораст од 4,6, односно 4,9 отсто. Од земјите членки на ЕУ, регистрирани се 21 милион патници, што претставува зголемување од 1,4 проценти во однос на истиот период во 2024 година. Од други земји, забележан е пораст од 9,1 отсто, со вкупно 14,2 милиони посетители.

Во месец октомври оваа година, Грција забележала зголемување на бројот на туристи за 7,2 отсто, додека приходите биле повисоки за 8,2 проценти во споредба со истиот месец лани.

Претходната година беше исклучително успешна за грчкиот туризам, со речиси 36 милиони туристи и приходи од 21,7 милијарди евра. Очекувањата се дека тековната година земјата ќе постави нов историски рекорд во туризмот.