Голем пад на европските берзи по царините на Трамп

Европските берзи утринава остро паднаа бидејќи инвеститорите стравуваа од трговска војна откако Вашингтон воведе царини на увозот од Канада и Мексико. Индексот STOXX 600 на водечките европски акции беше намален за 1 отсто во 9:30 часот, лизгајќи се од рекордно високо ниво.

Лондонски FTSE индекс се намали за 0,55 отсто, на 8.825 поени, додека франкфуртски DAX потона за 1,62 отсто, на 22.755 поени, а париски CAC за 1,14 отсто, на 8.106 поени.

Цените на акциите паднаа и на азиските берзи. Индексот на азиските акции MSCI беше намален за 0,3 отсто во 9:30 часот.

Јапонскиот индекс Никеи се лизна за 1,2 отсто, додека цените на акциите во Јужна Кореја, Хонг Конг и Австралија паднаа меѓу 0,1 и 0,6 отсто. Во Шангај, пак, тие благо се зголемија.

Инвеститорите се претпазливи бидејќи вчера американскиот претседател Доналд Трамп воведе царини од 25 отсто на увозот од Канада и Мексико.

Трамп имаше намера да ги воведе овие тарифи во средината на јануари, но ги одложи за еден месец за да им даде време на властите во соседните земји да преземат мерки за спречување на шверцот на дрога и илегалните имигранти.

Инвеститорите се плашат од трговска војна бидејќи Канада веќе одговори. Премиерот Џастин Трудо изјави вчера дека царините од 25 отсто за увоз од САД во вредност од околу 20 милијарди долари ќе стапат на сила веднаш.

Ако Вашингтон ги задржи тарифите во следните 20 дена, вели Трудо, ќе стапат на сила царините од 25 отсто за увоз во вредност од над 80 милијарди долари.

Мексико, во меѓувреме, соопшти дека ќе ги објави своите контрамерки во вторник.

Од денеска треба да стапат во сила и дополнителни царини од 10 отсто за увоз на кинески производи во САД, вкупно 20 отсто, имајќи предвид дека Вашингтон веќе пред еден месец ги зголеми царините на 10 отсто.

Кина соопшти дека ќе возврати со зголемување на царините за 10 до 15 отсто на низа американски земјоделски и прехранбени производи. Покрај тоа, таа најави ограничување на извозот и инвестициите за 25 американски компании.

Сите овие царини негативно ќе влијаат на меѓународната трговија и на целокупната глобална економија.

Ова е причината зошто берзанските индекси вчера остро паднаа на Волстрит. Dow Jones се лизна за 1,5 отсто, додека S&P 500 потона за 1,8 отсто, а Nasdaq индексот 2,6 отсто.