Германскиот генерал-мајор Андре Денк нов шеф на Европската одбранбена агенција
Денк, кој е првиот воен офицер избран на оваа функција од формирањето на ЕДА во јули 2004 година, во моментов е заменик извршен директор на Агенцијата.
Земјите членки на ЕУ донесоа одлука да го именуваат германскиот генерал-мајор Андре Денк за нов извршен директор на Европската одбранбена агенција (ЕДА).
Како што јави дописникот на МИА од Брисел, Денк, кој е првиот воен офицер избран на оваа функција од формирањето на ЕДА во јули 2004 година, во моментов е заменик извршен директор на Агенцијата.
Изборот на Денк претставува изненадување од причина што се сметаше дека на функцијата ќе биде именувана поранешната холандска вицепремиерка и министерка за одбрана и за внатрешни работи Кајса Олонгрен.
Според регулативите на Унијата, извршниот директор на ЕДА е директно подреден на високата претставничка на ЕУ за надворешни работи и безбедносна политика Каја Калас.
Именувањето на германскиот генерал на чело на ЕДА доаѓа во време кога ЕУ се обидува да ги убеди земјите членки да и дадат на Агенцијата поголема улога во координацијата на набавката на муниција и ракети, кон што особено е скептична Германија. Берлин е на ставот дека заедничките одбранбени набавки на земјите членки на ЕУ да ги врши некоја „водечка нација“ меѓу државите набавувачи, а не ЕДА.