Герапетритис за изјавите на Фидан: Не прифаќаме сугестии од никого
Грција ниту има фобични синдроми, ниту се определува според Турција. И не прифаќаме упатства од никого, нагласи министерот за надворешни работи на Грција Јоргос Герапетритис во реакцијата за изјавите на шефот на турската дипломатија Хакан Фидан, кој според грчките медиуми, ја предупредил соседната земја дека ако продолжи со „евтината политика“ може да предизвика криза меѓу Грција и Турција, јави дописничката на МИА од Атина.
Грција ниту има фобични синдроми, ниту се определува според Турција. И не прифаќаме упатства од никого, нагласи министерот за надворешни работи на Грција Јоргос Герапетритис во реакцијата за изјавите на шефот на турската дипломатија Хакан Фидан, кој според грчките медиуми, ја предупредил соседната земја дека ако продолжи со „евтината политика“ може да предизвика криза меѓу Грција и Турција, јави дописничката на МИА од Атина.
Герапетритис посочи дека ја разбираат „тензијата што може да ја предизвика силната и активна надворешна политика на Грција“.
– Сите треба да се навикнат на оваа реалност и да не ја претвораат непријатноста во непријателство. Добрососедските односи, кон кои Грција отсекогаш тежнеела, не се унапредуваат со неумерени и несоодветни изјави, рече шефот на грчката дипломатија.
Според „Катимерини“, министерот за надворешни работи на Турција во интервју за ТГРТ Хабер предупредил дека ако продолжи „евтината политика“ на Грците, а особено изјавите на министерот за одбрана Никос Дендиас, може да се појави криза меѓу Турција и Грција со непријатни геостратешки последици за Атина.