Претседателот на Србија, Александар Вучиќ, изјави дека по „тешката и успешна борба“ на преговорите со косовскиот премиер Албин Курти во Брисел, вечерва ќе им одговори на „сите политички и медиумски манипулатори што би ја погазиле сопствената држава за трошка власт“.
„Србија нема цена, тоа е нешто што тие никогаш не го разбраа. Ќе ги победиме. Србија ќе победи“, напиша Вучиќ со видеопорака на својот инстаграм-профил и им се заблагодари на граѓаните на Србија „за грижата и поддршката во тешкиот ден“.
Тој во најавата рече дека анализира сѐ што се случувало во Брисел и ги повика граѓаните да го следат неговото обраќање вечерва, бидејќи ќе зборува, како што рече, за „сите манипулации, лаги и невистини што ги шират не само тастатура-воините, тајкунските медиуми, туку и РТС, Танјуг и многу други“.
„Анализирам што сѐ се случи. Се боревме максимално во тешки услови и се боревме за иднината на Србија во мир, за продолжување на инвестициите во нашата земја. А ја чуваме нашата заклетва и Уставот на Србија и Косово и Метохија како дел од Србија“, рече тој Вучиќ.
Вчера во Брисел прво се одржаа одвоени разговори меѓу Вучиќ и Курти со еврокомесарот за надворешни работи, Жосеп Борел, и специјалниот пратеник на ЕУ за дијалог, Мирослав Лајчак, а потоа и заедничка средба во врска со предлогот на ЕУ за нормализација на односите меѓу Косово и Србија.
Како што се наведува во текстот на европскиот предлог за договор за нормализација на односите меѓу Белград и Приштина, Србија и Косово меѓусебно ќе развиваат нормални, добрососедски односи засновани на еднакви права, а Србија нема да се противи на членството на Косово во ниту една меѓународна организација.
По средбата во Брисел, Вучиќ рече дека чека да го види планот за имплементација во однос на претходно остварените обврски на Белград и Приштина, а дека на прво место е Заедницата на српски општини (ЗСО), и рече дека косовскиот премиер Албин Курти „дошол на таа средба со идеја нешто да се потпише“, но дека за тоа немало дискусија и дека такво нешто не било прифатено.
„Очекувам да го видам, пред сѐ, планот за имплементација што се однесува на претходно постигнатите обврски“, рече тој.