Блерим Веља – шефот на кабинетот на косовската претседателка Вјоса Османи изјави дека претседателот на Србија – Александар Вучиќ е единствениот државен лидер во регионот кој им се заканува со војна на соседите. Според него, светот треба да го санкционира Вучиќ, исто како што тоа го стори со рускиот претседател Владимир Путин поради неговата агресија врз Украина.
„Исто како и Путин, Вучиќ е единствениот претседател на држава во нашиот регион кој им се заканува со воени дејствија на своите соседи. Како и Путин, тој треба да се санкционира заради загрозувањето на мирот и стабилноста во регионот“ – напиша Веља на Твитер.
Повод за рекцијата на шефот на кабинетот на Османи беше изјавата на српскиот претседател дека на Албанците „нема да им оди така лесно“ ако се обидат да преземат некоја акција во северно Косово, при што ја спомена операцијата „Бура“ на хрватската војска против српските сили во војната во Хрватска во август 1995.
„Немам дилеми дека Албанците би сакале да извршат „Бура“ во северно Косово, но нема да им оди така лесно“ – изјави Вучиќ.