Александар Вулин – министерот за внатрешни работи на Србија изјави дека приемот на Косово во НАТО ќе претставува закана за Србија со вооружен конфликт.
„Да се стави Косово под покровителство на воената алијанса значи поништување на резолуцијата 1244 (Совет за безбедност на ОН), укинување на Кумановскиот договор и сите гаранции дадени од ОН, но и обврзување на сите земји членки на НАТО, во согласност со членот пет од Повелбата за територијалниот интегритет, да бидат должни да ја штитат новопримената членка“ – изјави Вулин.
Тој праша дали некој се сомнева дека косовскиот премиер Албин Курти „ќе се двоуми“ да изврши напади врз Србите, „особено на северот на покраината и да предизвика конфликти и провокации се додека државата Србија не биде принудена да го одбрани својот народ“.
„Насилното воведување на Косово во НАТО пактот не е само кршење на процедурите за пристапување во НАТО и газење на резолуцијата 1244, туку и отворена закана за Србија и друга форма на притисок врз српскиот претседател Александар Вучиќ, а тоа го знаат и земјите кои се залагаат за членство на Приштина во НАТО“ – додаде Вулин.
Вулин смета дека Косово не е држава, нема војска, а претставува политички проблем за најмалку четири членки на НАТО.