ВРЕДИ и ДУИ денеска во јавноста презентираа проекти за младите во Чаир.
Кандидатот за градоначалник на Општина Чаир од коалицијата ВРЕДИ, Изет Меџити, го претстави проектот за Младинскиот центар, се вели во соопштението од ВРЕДИ.
Според Меџити, Младинскиот центар ќе биде организиран на четири функционални нивоа:
Први кат: библиотека и сала за предавања, отворена за читање, истражувања и разни настани.
Втор кат: Дигитален центар со лабораторија за вештачка интелигенција (AI), компјутери и бесплатни обуки за програмирање, вештачка интелигенција и дигитална писменост. Овој кат ќе опфати и co-working простор за поддршка на младинските стартапи, како и менторска програма „од млади за млади“.
Трет кат: STEM академија, која ќе нуди обуки во областа на технологијата, науката, уметноста и математиката.
Четврти кат: простор за театар, советување и креативни активности, наменет за младите кои сакаат слободно и без бариери да се изразуваат.
„Младинскиот центар ќе биде средиште на новата генерација, каде што ќе се спојуваат образованието, иновациите, уметноста и креативноста. Тој ќе служи како платформа за личен и професионален развој на младите во Чаир,“ истакна Изет Меџити.
ДУИ, пак, преку соопштение, го пренесува видувањето на нивниот кандидат за градоначалник на Чаир, Бујар Османи.
„Денес сме собрани тука по една посебна причина, за вашите деца. Знам дека секојдневно се соочувате со предизвици кои не се лесни: од обезбедувањето соодветна терапија, до наоѓањето поддршка во училиштата, па се до можноста тие да имаат еднакви шанси во општеството. Затоа, денес не доаѓам со празни зборови, туку со визија и конкретен план изјави Османи, на средбата со родителите на децата со попречености, каде што вети отворање на Дневен центар за деца со посебни потреби.
„Едно место каде вашите деца ќе добиваат дефектолошка, логопедска и психолошка поддршка, но и место каде ќе се чувствуваат прифатени и сакани. Центарот нема да биде само институција, туку и втор дом, со активности кои ќе ги развиваат нивните таленти и способности. За вас, родителите, ќе обезбедиме советување и стручна поддршка, бидејќи знаеме дека грижата за дете со попреченост е грижа за целото семејство. Ќе создадеме фонд за финансиска помош, преку кој ќе се покрива дел од трошоците за лекови, терапии и специјални помагала. Вие нема да останете сами во оваа борба“, изјави Османи.
„Исто така, ќе работиме на уривање на бариерите во општеството. Децата со посебни потреби ќе учествуваат во спортски, културни и забавни активности заедно со своите врсници. Инклузијата е вистинскиот пат кон здраво и силно заедништво. Моја визија е Чаир да биде општина без бариери, општина каде секое дете ќе има еднакви можности да расте, да учи и да се развива. Вие и вашите деца сте во срцето на мојата програма, и јас ќе бидам тука со вас и по изборите, кога ќе треба оваа визија да ја претвориме во реалност“, нагласи Османи, претставувајќи го проектот „Чаир за сите деца; Инклузија и Поддршка“.