Во САД ја бојкотираат водката како солидарност со народот на Украина

Повеќе сојузни држави најавија бојкот на руски производи во солидарност со народот на Украина подложен на воена агресија од страна на Русија.

Гувернерот на Охајо, Мајк Девин, синоќа објави забрана на руски увозни стоки во сојузната држава. Слични чекори се најавени и во други сојузни држави.

Девин изјави дека дал директива до Одделот за комерција на Охајо веднаш да се запре како со набавката така и со продажбата на сите алкохолни производи водка од брендот „Руски стандарт“ кои се увезуваат од Русија.

Локалните медиуми известуваат дека во повеќе од 400 продавници за алкохолни пијалоци во Охајо моментално се продаваат 6.400 шишиња водка „Руски стандарт“.

Се наведува дека сите други водки именувани со руски имиња, но произведени од дестиларници кои не се лоцирани во Русија, можат да се продаваат.

Во Охајо живее голема руска и украинска дијаспора.