Во времето на Филипче инвеститорите не доаѓаа, бегаа, велат од ВМРО-ДПМНЕ
„Во негово време, инвеститорите не доаѓаа, бегаа. Македонија ја гледаа како држава заробена во корупција, рекети и фантомски фирми. Единствениот бум беше во тендери и раст на лични сметки на привилегирана СДС-ДУИ каста“, велат од владејачката партија.
Венко Филипче денеска повторно држи лекции за економија. Иронијата е дека човекот што летуваше на јахти додека народот едвај преживуваше, сега зборува за „достоинство“ и „развој“, истакнува ВМРО-ДПМНЕ во пишана реакција на ставовите на Филипче.
„Во негово време, инвеститорите не доаѓаа, бегаа. Македонија ја гледаа како држава заробена во корупција, рекети и фантомски фирми. Единствениот бум беше во тендери и раст на лични сметки на привилегирана СДС-ДУИ каста“, велат од владејачката партија.
Сметаат дека Филипче и СДСМ наместо нови фабрики, им донесле на граѓаните нови долгови, наместо работни места – затворени компании, а наместо економски раст, галопирачка сиромаштија. И тоа е вистината што никаков графикон не може да ја покрие.
Претходно, претседателот на опозициската СДСМ, д-р Венко Филипче, изнесе податок дека во првата половина на 2025 година, странските инвестиции се преполовени за разлика од 2024 година, кога СДСМ беше на власт. Тој додава дека секојдневно пропаѓа митот за наводната економска способност на ВМРО – ДПМНЕ
„Во првата половина од 2025 странските инвестиции се преполовени во однос на првата половина од 2024, кога СДСМ беше на власт. Со овој податок пропаѓа и последната излитена пропаганда на власта, дека во Македонија се случува инвестициски бум.
Секојдневно пропаѓа и митот за наводната економска способност на ВМРО-ДПМНЕ. Нема ниту еден економски параметар во кој оваа влада не е барем двојно послаба од владата на СДСМ“, пишува во објавата на претседателот на СДСМ, Д-р Венко Филипче.