Во Бугарија уапсени 35 лица за трговија со антиквитети вредни 100 милиони евра

Како резултат на координирана акција предводена од бугарските власти и поддржана од Европол вчера е разбиена криминална мрежа вклучена во голема трговија со културни добра низ Европа и пошироко. Во акцијата се уапсени 35 лица во Бугарија и се запленети над 3.000 антиквитети со проценета вредност од над 100 милиони евра.

Операцијата беше спроведена во рамките на оперативната работна група на Европол.

Во акцијата беа вклучени органите за спроведување на законот и судските власти од Албанија, Франција, Германија, Грција, Италија и Обединетото Кралство, а активностите беа координирани од центрите во Софија, Бугарија, и во Евроџаст (Eurojust). Истражните активности сè уште траат.

Истрагата започна по рација во куќа извршена во Бугарија во 2020 година, каде што властите запленија околу 7.000 културни артефакти со непроценлива историска и монетарна вредност. Овие предмети, првенствено грчко-римски и тракиски антиквитети, се од огромна вредност поради нивната уникатност и историско значење. Недостатокот на јасна документација за потеклото на многу од овие предмети, утврден од бугарските власти во тоа време, покрена сомнеж дека се нелегално стекнати. Од нивното запленување, артефактите се сместени во Националниот историски музеј на Бугарија во Софија, додека не заврши понатамошната истрага.

Во операцијата се извршени 131 претрес во куќи, возила и банкарски сефови (еден во Албанија, 120 во Бугарија, три во Франција, три во Германија, четири во Грција).

Запленети се над 3.000 артефакти (антички златни и сребрени монети и други антиквитети) со проценета вредност од над 100 милиони евра, уметнички дела, оружје, документи, електронска опрема, над 50.000 евра во готовина и инвестициско злато.

Главниот осомничен во овој случај се сомничи за финансирање нелегални ископувања низ Бугарија и соседните балкански земји. Се верува дека локални крадци, кои наводно работеле за посредници кои дејствувале во име на осомничениот, биле вклучени во незаконските операции.

Уметничката колекција запленета во 2020 година вклучува уникатни предмети, од кои некои датираат од 2000 година пр.н.е., како што се маски, воена опрема, накит, вазни, ритони и чаши од тракиската и грчко-римската цивилизација. Повеќето од артефактите немале документација за потекло, додека само мал дел имале сомнителна документација издадена од аукциски куќи и уметнички галерии низ светот, главно со седиште во Франција, Германија, Обединетото Кралство и САД.

Од јуни 2024 година, на иницијатива на бугарските власти, Европол формираше оперативна работна група за олеснување на размената на информации, координацијата и аналитичката поддршка. Работата на работната група доведе до идентификување на врски меѓу поединци со седиште во различни земји, како и лоцирање на други артефакти за кои се верува дека биле предмет на трговија од страна на членови на мрежата. На денот на акцијата, Европол распореди двајца експерти во Софија за да ја поддржат координацијата на активностите преку границите и да обезбедат аналитичка поддршка и експертиза.