Воведен полициски час во Лос Анџелес по немирите – Трамп: Оваа анархија нема да продолжи

Градоначалничката на Лос Анџелес, Карен Бас, воведе полициски час во центарот на Лос Анџелес, кој ќе важи од вторник во 20:00 часот до среда во 6:00 часот по локално време.

Одлуката влијае на релативно мал дел од градот – површина со големина од околу два и пол квадратни километри – но според пензионираниот капетан на сообраќајната полиција на државата Мисури, Рон Џонсон, мерката би можела да игра важна улога во смирувањето на протестите и овозможувањето на мирните демонстранти безбедно да се вратат дома.

„Мислам дека ова им дава шанса на полицајците барем малку да се одморат“, рече Џонсон, кој го предводеше одговорот на владата на протестите во Фергусон, Мисури, откако полицаец го уби 18-годишниот Мајкл Браун.

Градот е под силен полициски надзор, а десетици демонстранти се уапсени поради кршење на полицискиот час, но припадници на американските маринци и Националната гарда не се видени на улиците.

Иако распоредувањето на федералните сили предизвика контроверзии, тие во моментов не се гледаат како учествуваат во патроли или вршат апсења за време на протестите, јавува Би-би-си.

Полицијата доцна синоќа објави дека „се спроведуваат масовни апсења“ додека повеќе протестни групи продолжуваат да се собираат во зоната на полициски час.

„Повеќе групи продолжуваат да се собираат на Првата улица, помеѓу улиците Спринг и Аламеда“, објави полицијата на Лос Анџелес на социјалната мрежа X.

„Овие групи се под надзор, а започнаа масовни апсења“, се вели во соопштението.

Американскиот претседател Доналд Трамп денес изјави дека „странски непријатели“ го напаѓаат Лос Анџелес, каде што беснеат немири од петокот откако неговата администрација започна серија рации за имиграција, велејќи дека нема да дозволи беззаконието да продолжи.

„Оваа анархија нема да продолжи. Нема да дозволиме федерални агенти да бидат нападнати, нема да дозволиме странски непријатели да нападнат и освојат американски град“, рече американскиот претседател во обраќањето во воената база Форт Браг во Северна Каролина.

„Она што го гледате во Калифорнија е широко распространет напад врз мирот, јавниот ред и националниот суверенитет, предводен од бунтовници кои веат странски знамиња и имаат намера да поттикнат странска инвазија на нашата земја“, им рече Трамп на неколку илјади војници и цивили.