Властите во Русија го блокираа и Инстаграм

Регулаторното тело за медиуми во Русија – „Роскомнадзор“ денеска официјално го вклучи Инстаграм во листата на забранети сајтови, со што во Русија целосно се блокирани социјалните мрежи Фејсбук, Инстаграм и Твитер.

Инстаграм и другите мрежи, како и независни медиуми, се блокирани по барање на државното Обвинителство.

Откако Фејсбук времено им дозволи на корисниците на некои земји да повикуваат на насилство против руските војници, руското обвинителство поднесе пријава против компанијата Мета како „екстремистичка организација“ и побара забрана на руска територија.

Претставникот на Мета (Фејсбук), Енди Стоун изјави за Си-Ен-Ен дека времено се толерираат политички изјави кои обично ги прекршуваат правилата на Фејсбук, како што се насилничките изјави.