(Видео) Шукова: Не се изземаме од одговорност, направен е пропуст кај Кривичниот законик

„Согласно Законот колективна е одговорноста. Во Случајот со Артан Груби, од она што го дознаваме од јавноста, бидејќи имате пристап до е-системот на Владата кога сте таму функционер, неможеме да паметиме секоја седница на Влада што се случувало. Тоа било дополнителна точка на Влада, како пристигнала, кој ја поднел. Сите министри во одредени моменти, доставуваат дополнителни точки на Влада, меѓутоа тие се точки кога имате итност, заради временски рокови, мораат тие информации, одлуки, решенија да поминат, но во тој случај како носител на ресор, на колегите од Владата им давате образложение зошто истото мора да биде како дополнителна точка.

-Во овој случај јас не паметам кој ја поднел оваа точка, тоа треба да го истражат органите и да се види“, вели потпретседателката на СДСМ, Каја Шукова за тоа чива е одговорноста за случајот со Артан Груби, имајќи предвид дека екс премиерот Ковачевски се дистанцира од секаква одговорност.

За тоа зошто како партија СДСМ се иззема од одговорноста и се префрла вината кај власта во однос на случајот со Груби, кога токму во време на СДСМ беа донесени измените во Кривичниот законик, Шукова вели дека сегашниот претседател на партијата има кажано дека е направен одреден пропуст во Кривичниот законик.

„Одговорноста за тоа секако дека ја носиме, а во овој случај ние не велиме дали е некој одговорен или не, ние само велиме да нема политизирање на случајот, да се чека, како што вели и ЕУ амбасадорот, правдата да си го направи своето. Дајте да дадеме време, има кривична пријава, сега треба да реагира Обвинителството. Во овој случај од она што го слушаме во јавноста, од 8 лица кон шест веќе има покренати обвиненија, за две сѐ уште се работи на случајот.

-Кој е крив за бегството или пропуштањето на Груби на границата, има истражни органи, ние само велиме – дајте да видиме и мора да излезе вистината на виделина, бидејќи ваквите случаеви ако продолжат да ни се повторуваат дефинитивно праќаат многу лош сигнал кај граѓаните за тоа како се практикува власта.

-Политиката ни се темели на социјалдемократските вредности, едни од постулатите ни е се борбата против криминалот и корупцијата. Во секое едно општество, и во секоја една власт секогаш има одредени поединци кои го прекршуваат законот. Ниту една политичка партија не може да каже дека нема да има има поединци коишто ќе го прекршат законот и заради тоа постојат институции во државата кои тоа треба да го откријат, вели Шукова за тоа како двајца вицепремиери од Владата предводена од СДСМ се најдоа на „Црната листа“ на САД.

За консолидирањето на партијата во претстој на локалните избори, а после лошиот резултат на парламентарните, Шукова смета дека ништо не треба да обесхрабрува и она што се случува во изминатите шест месеци доволно им покажа на граѓаните дека она што беше ветено во предизборието од страна на ВМРо-ДПМНЕ многу малку се спроведува.

-Тука мислам на оние неколку главни наративи врз основа на кои ја доби поддршката на преку 400.000 граѓани во државата. Она што ние секогаш сме го кажувале и ќе продолжиме да го кажуваме е дека одлуките коишто се во интерес на државата или државничките одлуки како што е влезот на државата во НАТО и ред други одлуки ако одиме генеза наназад, сепак биле во времето на владеењето на СДСМ. Не велиме дека немало грешка, но сметаме дека граѓаните ќе видат повторно дека оние кои навистина се грижат за државата и носат државнички одлуки, а ние заради тоа многу често и го губиме интересот кај граѓаните, бидејќи одлуките можеби и нас не ни се допаѓаат, но се во интерес на државата и во одреден момент мора да се донесат“, вели Шукова.

За тоа како ќе се настапува на претстојните избори, потпретседателката на СДСМ вели дека сигналите покажуваат дека треба да се оди самостојно, но за тоа допрва треба да се одлучува во партијата.

Целосното интервју со потпретседателката на СДСМ, Каја Шукова, погледнете го во видеото.