(Видео) Тунески: РЕК Битола не смее да биде извор на криминал, потребни се казни

„Добро е што идејата е „Чебрен“ да биде државен, македонски проект. Добро е што се отстапи од идејата на претходната Влада „Чебрен“ да се даде на соседна Грција, односно што се прават напори „Чебрен“ да се финансира со наши пари колку што е можно и ако нешто недостасува да се вклучат некои партнери“, вели за „Трилинг“, проф. Атанаско Тунески.

Околу тоа колку долго овој проект би се градел и колку би не чинел, проф. Тунески вели дека поранeшната идеја била дека „Чебрен“ ќе чини околу милијарда евра.

„Ние тогаш го критикувавме тоа. Велевме дека така голем „Чебрен“ не треба да се гради, дека толку висока брана од 192 метри не е потребно да има, дека нема толку вода во тоа подрачје, дека „Чебрен“ од 300 mw е преголем, но пресметките ќе покажат дали е тоа така или не. Оптимален „Чебрен“ не би ме изненадило да чини околу 600-700 милиони евра, со оглед дека „Чебрен“ би се градел десетина години, тогаш Македонија би требало да издвојува помалку од 100 милиони евра за во десет годишен период го изгради „Чебрен“.

За тоа како „Чебрен“ би останал во македонска сопственост како што е најавено и од каде пари – дали од самофинансирање или преку јавно-приватно партнерство, Тунески вели дека отсекогаш се залагал 100% „Чебрен“ да биде во наше владение.

„Мислам дека имаме сили за тоа. Добрата страна е што парите не треба да се дадат преку ноќ или во една година, туку се даваат во десетина години. Со оглед дека нашиот буџет е околу 6 милијарди евра, тогаш ние сосема мал дел од буџетот треба да издвојуваме годишно за да го изградиме „Чебрен“. Дека пари има, уште еден доказ е што 2022-2023 година, во таа критична година заради високиот пораст на цените на електричната енергија, Македонија издвои над 200 милиони евра за увоз на струја. Ние и сега увезуваме сериозни количини на струја, односно даваме пари за увоз. Значи пари има, само треба правилно да се пренасочат. Она што мора да се купи од страна мора, но дел мора да се одвои за да се изгради наш капацитет којшто од една страна ќе дава хидро-енергија којашто е најскапа, но од друга страна ќе биде многу значајна за акумулирање на енергијата“, смета проф. Тунески.

Во однос на тоа дали всушност РЕК Битола стана непресушен извор за криминал и корупција, проф. Тунески вели дека до сега никој не порекнал дека тоа е така.

„Факт е дека големи пари се трошат на тој јаглен и факт е дека да купеше РЕК Битола своја сопствена механизација и од сопствени сили да го копаше јагленот многукратно ќе беше поисплатливо. Вака повеќе пари се дадоа на фирми надвор од РЕК Битола да го ископуваат јагленот. За да се спречи евентуален криминал треба да се почне со казни. Не може со апелирање, со добра волја и со добар збор да се влијае луѓето да не го прават тоа. Треба да се казни некој и казната ќе влијае наредниот да не го прави тоа. Значи само казната е решение“, вели проф. Тунески.

Целото интервју со проф. Тунески погледнете го во видеото.