(Видео) Трилинг: „Црната листа“ како почеток за разобличување на корупциско-криминогените заврзлами!?

„Ставањето на „Црната листа“ од страна на американската администрација е согласно нивните интереси. Сите лица што ги ставаат на т.н. „Црна листа“ е заради штитење сопствените интереси и помагаат во борба против корупцијата, високото политичко влијание на земјите кои се нивни партнери или на целиот регион, а ние како земја стратешки партнер на САД, ако го вреднуваме стратешкото партнерство тогаш треба да ги вреднуваме и нивните наоди, вели поранешната пратеничка и колумнистка Никица Корубин, во најновото издание на „Трилинг“.

-Денеска сите го заборавија и СЈО како специјализирано обвинителство надвор од системот на заробената држава која веќе беше констатирана со извештаите на Прибе, што треба да ја гони високата корупција. Против СЈО имаше една здружена акција. Мислам дека е тоа кругот што го затвора или го посочува американската администрација и ни помага да се потсетиме зошто беа граѓанските протести, од кого беа узурпирани и зошто ние после осум години се враќаме не на ситуацијата од 2016-та, туку сакаме да се вратиме на ситуацијата пред 2001 година, вели Корубин.

„Уставниот суд е практично темелот кој треба да ја цени уставноста и законитоста и пред се правата и слободите на граѓаните и така треба да се постапува од наша страна кон него и од негова страна кон нас. Она што го видовме деновиве, сите оние политички притисоци, мислам дека беа одвишок и тотално непотребни“, вели министерот за локална самоуправа Златко Перински во новото издание на „Трилинг“, околу тоа дека Законот за употреба на јазиците е ставен на стенд-бај, односно дали е привремено купен мирот или сепак ќе се најде решение кое ќе биде прифатливо и нема да предизвикува турбуленции во општеството.

Говорејќи за претстојните локални избори и дали во ВМРО-ДПМНЕ расте внатрепартиската битка помеѓу Златко Перински и Орце Ѓорѓиевски за иден градоначалник на Скопје, министерот вели дека никогаш нема да дозволи да има внатрепартиска битка.

„Со тие луѓе јас сум растел и сум се развивал во политичкиот живот и така ќе биде до крај на овој процес. Самата партија врз основа на анкетите, врз основа на задоволството на граѓаните од перформансите што ние ги испорачуваме како јавни функционери ќе се донесе одлука кој ќе биде потенцијален кандидат за Градоначалник на Скопје“, изјави Перински.

„Ние сме им благодарни на нашите стратегиски партнери. Исклучително благодарни што и со ставање вака на „Црни листи“ помагаат. Тоа е сериозна помош и ние сме им благодарни. Но тоа сериозно треба да не замисли внатре во државата како функционира нашиот правосуден систем и како може странска држава да успее да дојде до таков тип на податоци, а нашите правосудни органи тоа да не успеат да го направат“, изјави за „Трилинг“, проф. Бобан Карапејовски, пратеник од ЗНАМ, говорејќи за последната одлука на Стејт департментот, поранешниот вице премер Груби и судијата од Апелациониот суд Беџети да бидат ставени на „Црната листа“ на САД и дали пред се ова претставува „шлаканица“ за македонскиот правосуден систем.

Говорејќи за спорните елементи во Законот за јазиците, Карапејовски вели дека исклучително спорен е указот за прогласување на Законот без потпис од претседателот на државата, сѐ едно што тој има обврска во определен временски период да потпише.

„За непотпишувањето има соодветни консеквенци. Вие да внесете во една држава апослутна двојазичност и тоа да го направите преку ноќ, без да дадете извесен период во рамките на општеството и на институциите да се приспособи, тоа е неприменливо. Не можете степенот на комуникација да го издигнете на соодветно рамниште ако тоа го направите преку ноќ. И тоа се всушност забелешките и на Венецијанската комисија“, вели Карапејовски.

Целото издание на магазинот „Трилинг“ со Горазд Чомовски, погледнете го во видеото.