(Видео) Трилинг: Една искра, огнена стихија, политички пожар – ќе успеат ли Мицкоски и Филипче да го изгаснат?

Во новото издание на магазинот „Трилинг“ разговаравме со Оливер Спасовски координатор на пратеничката група на СДСМ и екс министер за внатрешни работи, аналитичарот Сефер Селими и Ирена Ивановска сениор директор на Семос едукација.

„Последнава година имаме работење без лиценца на дискотеката „Пулс“, а верувајте такви сигурно има уште повеќе кои овој временски период работеле без неа“, изјави во „Трилинг“, поранешниот министер за внатрешни работи Оливер Спасовски.

-Во 2009 година кога ВМРО-ДПМНЕ е на власт се менува Закон за угостителска дејност во којшто се намалуваат критериумите за минимално-техничките услови на вакви објекти. За тоа да не е до крај либерално како што некој го посакувал повторно во 2012 година уште се намалуваат тие критериуми и само сопственикот на објектот под полна материјална и кривична одговорност може да гарантира дека тој објект ги исполнува условите, вели Спасовски.

-Главната одговорност, додава Спасовски, треба да ја даде една истрага којашто нема да биде селективна, истрага којашто ќе биде транспарентна и главната одговорност мора да биде насочена кон утврдување на фактите, односно на каузалната поврзаност во однос на несреќата и токму заради тоа сметам дека, до сега барем, сосема е јасно дека ниту еден актуелен носител на функција, на позиција нема утврдено одговорност или нема повикано да се изјасни во однос на неговата одговорност вклучувајќи го тука актуелниот градоначалник на Кочани.

-Од аспект на безбедноста пропусти има во МВР, заради тоа што ако вие имате план за една контрола на малолетници и тргување со опојни материи во таа дискотека, за таа вечер, тоа подразбира дека знаете како институција дека таа дискотека функционира. Многу важно прашање е зошто ако е контролата за малолетници таа не започнува пред 24 часот кога и треба да се утврди дали постојат малолетници, туку започнува, според кажувањата на официјалните лица, пет или десет минути пред настанувањето на трагедијата.

-Се отвораат прашањата зошто ниту еден кој бил задолжен да ги прави проценките во делот на безбедноста, да се направи планот за проценка на ризик тоа не го направил.

-Се поставува и прашањето зошто ако внатре имало полициски службеници не ја прекинале забавата, не се постапувало по планот којшто го имале за контрола итн. Доколку таа забава била прекината, очигледно дека немало да се случи ова што се случи.

-Така што постојат низа на прашања коишто се отворени во овој момент и навистина посакувам да низ таа транспарентна истрага да се утврди одговорноста на секој еден. Но сега и во овој момент, а не да бараме одговорности кај некои пред 10, 12 години, туку да бараме во моментот кога се случила несреќата“, вели Спасовски.

На прашањето за тоа како успеа мафијата да се инфилтрира во МВР, луѓе од обезбедувањето на премиерот Мицкоски да бидат спојна жичка со криминални банди, Спасовски потсети на неколку факти кои, како што вели многу лесно даваат одговор на ова прашање.

„Се сеќавате на еден кој од опкружувањето на Мицкоски или од обезбедувањето додека беше лидер на опозицијата нападна службено лице при контрола на дрога во еден скопски објект. Кога таквото постапување беше санкционирано, односно поведени беа сите постапки за на крај таквите постапки да немаат епилог, туку беше ослободен и од дисциплинска одговорност, а сега според информациите дури напредува во службата.

-Сега имаме случај со еден телохранител на актуелен претседател на Влада. Тука веќе се поставува прашањето и за безбедноста на самиот претседател на на Владата, на безбедноста на целиот тој систем, но клучното и најважното прашање не е само за тргувањето со тие документи кој тоа директно го направил. Вистинското прашање е од каде се тие документи и кој му ги дал за да бидат доставени до одредени криминални групи“, вели Спасовски.

Тој смета дека на ова поле мора многу жестоко да се работи и не смее да има толеранција.

За тоа кои би можеле да бидат луѓето во МВР кои одавале информации и дали всушност луѓето во шестата управа се „заштитени мечки“, Спасовски вели дека на ова прашање одговор мора да дадат институциите и Јавното обвинителство.

„Затоа јас го поставив клучното прашање кое треба да биде одговорено, а тоа е кој ги дал документите за да можат тие да бидат злоупотребени. Инаку, никој во ниту еден момент не смее да биде заштитен. Факт е дека секогаш кога ВМРО-ДПМНЕ е на власт, луѓето во шестата управа, оние кои се во непосредно опкружување на одредени функционери имале и соодветна заштита“, додава Спасовски.

Можни се предвремени парламентарни заедно со локалните избори

Говорејќи за домашната политичка сцена каде се разгорува внатрепартиската битка во коалицијата „ВЛЕН“ и дали е тоа реална конфронтација или обид за дефокусирање на јавноста од трагедијата, Селими вели дека голем број луѓе тоа го толкуваат во насока дека „еве веќе никој не зборува за трагедијата во Кочани, за сите тековни истраги и на некој начин одбегнување на одговорноста на луѓето кои навистина треба да одговраат пред обвинителството, Селими смета дека ова разгорување во „ВЛЕН“ не е неочекувано.

„За мене можеби е неочекуван моментот кога ова се случува, но овие односи или ривалство за лидерство внатре во „ВЛЕН“ е доста долго дури од самите почетоци на коалицијата. Сржта на целиот овој проблем стои во тоа дека „ВЛЕН“ нема идеолошки столб којшто ги поврзува овие политички партии. Единствено нешто што ги поврзува е пристапот до власта и моќта. Идеолошки воопшто немаат никаков спој. Визија за тоа каде треба да се движи Македонија воопшто не гледаме. Некое сериозно залагање за унапредување на политичкиот, правниот статус на Албанците не гледаме. Значи нема никаква сериозна поврзаност која би можела да биде двигател кај нивното сојузништво. И веќе подолго време се знае дека во „ВЛЕН“ имаме два блока. На една страна се Меџити и Гаши и Касами, од друга страна е Таравари и тоа пред сѐ се однесува на поделбата на моќта внатре во коалицијата“, вели Селими.

За податокот дека од една страна Таравари инсистира партиите од коалицијата да настапат со посебни листи на локалните избори, а од друга страна Демократското движење, БЕСА и Алтернатива имаат различен став и за тоа колку „ВЛЕН“ без Таравари ќе „тежи“ и колку Таравари има моќ сам да ја менаџира целата состојба, Селими вели дека тоа оди на тезата дека внатре, посебно Таравари се чувствува дека неговата моќ и во владината коалиција, но и внатре во „ВЛЕН“ не се совпаѓа со неговата моќ на терен.

Дали може да се препознае кокетирање на Таравари со ДУИ, односно она што веќе во кулоарите се зборува дека тој сериозно разговара со интегративците да се повлече од министерската функција за потоа да биде иден кандидат за градоначалник на Гостивар со нивна поддршка, Селими смета дека сега играта е отворена и секој со секого преговара. Според него влегуваме во еден динамичен период на репозиционирање и можеби регрупирање на политичките структури.

„Како тоа ќе резултира ќе треба внимателно да го следиме и никој не може да го прејудицира исходот. Но дека имаме поместување тоа веќе станува очигледно за целокупната јавност. Нормално дека ќе има обиди за релативизација на ова што се случува, но јас сметам дека односите во Владата се веќе нарушени и се влегува дури и во некакви калкулации не само за локалните избори, туку и можноста за предвремени парламентарни избори заедно со локалните“, вели Селими.

Ќе згаснат многу професии, а некои ќе бидат заменети со нови ВИ занимања

Постојат позитивни предизвици, затоа што Вештачката интелигенција (ВИ) веќе станува составен дел од сечиј живот. Користењето е секојдневно. Порано беше нешто што се разбираше дека е Научна фантастика и дека станува збор на одредена група на профили како што се ИТ професионалци. Но веќе не е така, веќе ВИ допира до сите улоги во една компанија. Сите се вклучени со тој позитивен предизвик и сите на свој начин користат одредени алатки коишто ќе придонесат да станат попродуктивни да ги заменат оние репититивни таскови со одредени ВИ агенти“, изјави за „Трилинг“, Ирена Ивановска, сениор директор во Семос едукација, за тоа кои се предизвиците со Вештачката интелигенција (ВИ).

На прашањето, на пример, дали може актерството, новинарството да бидат алтернатива на некоја друга професија, Ивановска вели дека сепак оној личен состанок, фидбек е многу поемпатичен и многу попозитивен, наместо да се зборува со некој виртуелен агент.

„Не верувам дека новинарството, како новинарство ќе исчезне, затоа што сепак кога поставувате генерирани прашања мора да знаете дали тоа е соодветно за говорникот или не. Значи мора да постои одредена граница која што Вие ја поставувате како ќе се движи тоа интервју“, вели Ивановска.

Околу тоа дали постои опасност и простор за згаснување на некои професии и кои би биле тие, Ивановска вели веќе во производствениот систем роботиката е нормален дел, но сепак постојат луѓе кои ги менаџираат тие роботи и мора да бидат контролори на целиот систем и процес.

„Не верувам дека одеднаш ќе исчезнат многу професии, но постепено некои ќе бидат заменети со нови ВИ професии“, смета Ивановска.

Според неа, број еден е да се заштити приватноста и сигурноста на податоците.

Целото издание на магазинот „трилинг“ со Горазд Чомовски погледнете го во видеото.