(Видео) Славески: Купуваат џипови по 100.000 евра а плаќаат придонес на минимална плата

„Предлогот на Фискалниот совет беше невнимателен. Ниту една земја до сега не постигнала нагло зголемување на старосна граница. Не може на вработени кои треба да се пензионираат наредната година да им кажете дека ќе мора да работат уште три години. Зато велам дека беше малку непрофесионално и невнимателно пласирана таа мерка. Останува Владата да бара други решенија. Секако дека е голем товар дефицитот во Пензискиот фонд кој што се финансира од буџетот, вели проф. Трајко Славески околу најавите и барањата за зголемување на старосната граница за пензионирање.

За генезата на тој дефицит и прашањето зошто кај нас нема дебата за овој проблем, Славески вели дека „уште од 2000-та година притисок што го изврши Светска банка да го воведеме вториот Пензиски столб, беше предвидено дека за десетина години ќе има т.н. „транзициски дефицит“, затоа што ако одземете 1/3 од средствата, од придонесот на ПИОМ и ги префрлите во приватни пензиски фондови, нормално дека ќе дојде до дефицит“.

„Тоа беше една голема заблуда, тој „транзициски дефицит“ се провлекува веќе трета деценија, а може да трае дури и половина век, односно никогаш „бел ден“ да не види буџетот и Пензискиот фонд од воведувањето на приватните пензиски фондови, смета проф. Славески.

„Државниот пензиски фонд и сега не е одржлив. Не е Фонд ако има дефицит. Фондот, се знае, собирате средства и ги користите за намени без некои инекции од надвор. Начи и сега не е одржлив. Ќе станува се понеодржлив доколку не се направат некои реформи во смисла на решавање на проблемот со вториот Пензиски столб, понатаму овозможување на возрасните коишто навршиле возраст за пензионирање да можат да работат подолго, евентуално во иднина доколку се создатат такви услови, ако порасне стандардот зголемување на стапката за придонес, ништо не е исклучено и има уште еден проблем кај нас – самовработените и некои професии како адвокати, лекари итн. плаќаат придонеси на минимална плата, а имаат многу повисоки доходи. Имаме луѓе коишто возат џипови по 100.000 евра а плаќаат придонес на минимална плата“, додава Славески.

Говорејќи за Буџетот Славески вели дека тој е премногу оптоварен со трансфери, на пример кон фондот за ПИОМ, платите се висока ставка, субвенциите итн.

„Развоен е секој буџет кој што паметно и до максимум ќе ги искористи предвидените средства за капитални инвестиции“, смета Славески.

За тоа дали може да се збори за економска одржливост во ситуација кога јавниот долг полека се приближува кон 70%, Славески вели дека Владата и покрај реализација на проектите коишто се предвидени, по овие шест месеци на консолидација по затекнатата положба, треба да мисли и на фискална консолидација.

„Тоа значи намалување на буџетските дефицити, затоа што јавниот долг не е ништо друго туку кумулирани, насобрани буџетски дефицити. Оттука мора да се стремиме да се приближиме до нивото предвидено со фискалното правило од 3%буџетски дефицит од сегашните близу или над 5%, што секако ќе влијае и на стабилизација. Значи прво треба да се стабилизира нивото на јавниот долг, кое што е високо и подоцна да може да се намалува како процент на БДП. Јавниот долг секогаш се цени како процент од БДП. Може да го намалите со намалување на непродуктивните трошења, генерално со намалување на расходите и со раст на БДП-то“, потенцира Славески.

Околу состојбата во Град Скопје, постојаното префрлање на вината помеѓу локалната и централната власт, обвинувањата на градоначалничката кон Советот на градот, Славески вели дека нема аритметичко дефинирано мнозинство во Советот на Град Скопје.

„Мнозинство може да се формира по одредени прашања коишто се во интерес за граѓаните. Тука работата на градоначалникот во ваква консталација, на фрагментација на политичката сцена во Скопје која што ќе продолжи и во иднина, градоначалникот треба да биде тоа кохезионо, сврзивно ткиво коешто низ разговор, објаснување, со координаторите на советничките групи, со советниците, ќе доведува до консензуси. Тоа отсуствува овдека. Најсвеж пример е работата околу буџетот. Никој не беше вклучен во подготовка на предлог буџетот за 2025-та, а сега се очекува наредната недела советниците без поднесување на амандмани, без дискусија да го усвојат. Еден пристап – земи или остави“, вели проф. Славески.

Целиот разговор со поранешниот министер за финансии, сегашен претседавач на Советот на Град скопје проф. Трајко Славески погледнете го во видеото.