-Веќе подолго време се знае дека во „ВЛЕН“ имаме два блока. На една страна се Меџити и Гаши и Касами, од друга страна е Таравари и тоа пред сѐ се однесува на поделбата на моќта внатре во коалицијата.
– Сметам дека односите во Владата се веќе нарушени и се влегува дури и во некакви калкулации не само за локалните избори, туку и можноста за предвремени парламентарни избори заедно со локалните.
-Лидерската средба ќе произведува многу повеќе поделби отколку што ќе ги зближува сите страни во нашата држава, а тоа ни е потребно во моментов, посебно од тоа што ќе следи во периодот во однос на геополитичките случувања и на глобално и на регионално ниво.
„За мене не беше неочекувано воведувањето на царините. Американската администрација пред сѐ се води од стратешките интреси на САД. Тоа се однесува и на односите со своите партнери. Секако во овој момент е отрезнување на Владата дека односите со американската адинистрација не можат да се градат на лично ниво, со луѓе блиску до администрацијата на Трамп, туку треба да се воспостави сериозна надворешна политика помеѓу двете администрации“, изјави за магазинот „Трилинг“, аналитичарот Сефер Селими говорејќи околу одлуката за воведување на царини за Македонија од 33%.
Селими додава и дека не можеме да се потпираме на ПР релации со САД, туку потребно е сериозно да работиме и да се посветиме и да креираме навистина стратешки партнерски односи.
„Тоа подразбира пред сѐ не само комуникација, не само наводно или јавно додворување до новата администрација или до ‘новото нормално’ како што сака нашата Влада да го именува, туку со реални политики. Тука треба да почнуваме и да размислуваме дали паралелниот стратешки партнер, пред сѐ зборува за унгарската Влада на Орбан и унгарските пари кои се поткрепени со кинеско финансирање се вистинскиот пат со кој ние треба да се приближиме напред“, додава Селими.
-Нам ни фали, вели Селими, сериозна надворешна политика за градење на сериозни, стабилни стратешки односи. Ние не смееме да се потпираме на еуфорични Фејсбук постови кои нашите владини претставници ги прават по спортски сали гледајќи говори на Трамп. Таму треба да се работи сериозно, со конкретни политики, со конкретни инвестиции од наша страна за градење на таквите односи. Новата администрација на Трамп прави тектонски промени во геополитички план. Нема веќе ‘здраво за готово’ партнерство со САД. Ние не ни влегуваме во приоритетите на оваа нова администрација. Оваа администрација се подготвува за ново ривалство во следниот преиод, а тоа е ривалството со Кина. За администрацијата на Трамп веќе гледаме дека Русија не ни влегува во топ приоритетите, вели Селими.
Говорејќи за домашната политичка сцена каде се разгорува внатрепартиската битка во коалицијата „ВЛЕН“ и дали е тоа реална конфронтација или обид за дефокусирање на јавноста од трагедијата, Селими вели дека голем број луѓе тоа го толкуваат во насока дека „еве веќе никој не зборува за трагедијата во Кочани, за сите тековни истраги и на некој начин одбегнување на одговорноста на луѓето кои навистина треба да одговараат пред Обвинителството, Селими смета дека ова разгорување во „ВЛЕН“ не е неочекувано.
„За мене можеби е неочекуван моментот кога ова се случува, но овие односи или ривалство за лидерство внатре во „ВЛЕН“ е доста долго дури од самите почетоци на коалицијата. Сржта на целиот овој проблем стои во тоа дека „ВЛЕН“ нема идеолошки столб којшто ги поврзува овие политички партии. Единствено нешто што ги поврзува е пристапот до власта и моќта. Идеолошки воопшто немаат никаков спој. Визија за тоа каде треба да се движи Македонија воопшто не гледаме. Некое сериозно залагање за унапредување на политичкиот, правниот статус на Албанците не гледаме. Значи нема никаква сериозна поврзаност која би можела да биде двигател кај нивното сојузништво. И веќе подолго време се знае дека во „ВЛЕН“ имаме два блока. На една страна се Меџити и Гаши и Касами, од друга страна е Таравари и тоа пред сѐ се однесува на поделбата на моќта внатре во коалицијата“, вели Селими.
За податокот дека од една страна Таравари инсистира партиите од коалицијата да настапат со посебни листи на локалните избори, а од друга страна Демократското движење, БЕСА и Алтернатива имаат различен став и за тоа колку „ВЛЕН“ без Таравари ќе „тежи“ и колку Таравари има моќ сам да ја менаџира целата состојба, Селими вели дека тоа оди на тезата дека внатре, посебно Таравари се чувствува дека неговата моќ и во владината коалиција, но и внатре во „ВЛЕН“ не се совпаѓа со неговата моќ на терен.
„Мислам дека тука барем двајца од политичките претставници, а посебно Алтернатива не заслужува толку многу власт колку што има добиена од „ВЛЕН“. Сите претпоставки и во јавноста и пред и после изборите беа дека најмалку од сите политички партии придонес во „ВЛЕН“ има Алтернатива. Но Алтернатива ја држи една од трите најважни функции во нашата држава – претседателот на Собранието. Плус, Алтернатива има добиено 25% од сите други позиции внатре во коалицијата. Јас и порано реков дека ова ќе биде проблематично поради тоа што имаме премногу партии со премалку власт и со премногу изборни ветувања“, смета Селими.
Кога Таравари вели дека не е крив Мицкоски, дека неговата Влада добро работи, проблемот е „ВЛЕН’ бидејќи нема синхронизација и дали е ова само навестување за почеток на крајот на соработката или „љубовта“ меѓу Таравари, Касами, Гаши и Меџити, Селими вели дека сведоци сме на жестоки реакции од сите страни.
„Таравари на некој начин игра на топло-ладно, не дава дефинитевен правец на каде се води неговата партија, но од другиот блок внатре во „ВЛЕН“ имаме сериозни обвинувања и сериозни изјави од челниците на трите партии. Треба само да се навратиме и да ја анализираме изјавата на министерот Фатмир Лимани кој го нарече Таравари „Тројански коњ“. Јас знам дека власта некогаш ве прави прагматичен и Вие треба да ги проголтате своите навреди кон другите во минатото, но јас не знам како би можеле они да седнат на ист состанок на владина седница заедно со Таравари“.
Дали може да се препознае кокетирање на Таравари со ДУИ, односно она што веќе во кулоарите се зборува дека тој сериозно разговара со интегративците да се повлече од министерската функција за потоа да биде иден кандидат за градоначалник на Гостивар со нивна поддршка, Селими смета дека сега играта е отворена и секој со секого преговара. Според него влегуваме во еден динамичен период на репозиционирање и можеби регрупирање на политичките структури.
„Како тоа ќе резултира ќе треба внимателно да го следиме и никој не може да го прејудицира исходот. Но дека имаме поместување тоа веќе станува очигледно за целокупната јавност. Нормално дека ќе има обиди за релативизација на ова што се случува, но јас сметам дека односите во Владата се веќе нарушени и се влегува дури и во некакви калкулации не само за локалните избори, туку и можноста за предвремени парламентарни избори заедно со локалните“, вели Селими.
Говорејќи за последните препукувања каде Милошоски вели дека министерот Филков има слаби перформанси, додека вториот му возврати дека е „Кусурот“ на Груевски и дали е ова фингирано бранување во односите или на виделина се реалните разлики во владината коалиција, Селими смета дека ЗНАМ моментално е во многу длабока криза во однос на нивниот перформанс и нивното политичко позиционирање во поддршка на ВМРО-ДПМНЕ.
„Ние немаме некои сериозни опипливи резултати на оваа власт, на којашто ЗНАМ ќе може пред своето членство да оправда зошто се наоѓа во оваа Влада. Од друга страна ЗНАМ од коректор на оваа власт, како што преферираа да се нарекуваат, станаа апологети на секаков владин пропуст и секој владин неуспех. Значи стануваа соучесници на слабиот владин резултат и перформанс што го има Владата. Од друга страна имате едно јасно и гласно неподнесување помеѓу ВЛЕН и ЗНАМ. Единствено на Мицкоски, после трагедијата во Кочани, како тоа се се изменаџира, како тоа се се подготвува вината и одговорноста да остане кај поранешните функционери, а овие од сегашната власт да се спасуваа, се потешко ќе биде да може да има добра енергија за да ги води тешките процеси кои следуваат во оваа држава, не само како внатрешни динамики, туку и динамики кои ќе не опкружуваат нас, вели Селими.
Во полето на политичките шпекулации се дека и министерот Таравари бил преигран од премиерот Мицкоски околу апсењето и притворот на газдата на „Пуцко петрол“, Асмир Јахоски и колку овие политичко-бизнис релации дополнително создаваат тензии во односите во владината коалција, Селими вели дека не само во оваа власт туку и во минатите, блиските релации и бизнис интереси биле едни од главните фактори кои ја диктирале релацијата помеѓу различните актери во самите политички партии, како и надвор од партијата.
„Јас мислам дека повеќе од овие заеднички бизнис и политички интереси во овој момент не е помеѓу Таравари и Мицкоски, туку шпекулациите за сериозен договор помеѓу Заев и Мицкоски кој се поврзува и со политички, но и со бизнис интереси.
Говорејќи околу тоа дали е возможно ДУИ да ги бојкотира локалните избори, Селими смета дека најавите за бојкот се поврзани директно со одлуката која ќе треба да произлезе од Уставниот суд во врска со албанскиот јазик знаејќи дека перцепцијата е дека таму има обид за политичка одлука.
„Апсењето на Крешник Бектеши јас не го поврзувам со неучествување на локални избори. Тој дел го гледам како обид ДУИ да прикаже дека има селективна правда само за бивши функционери, а не за актуелни кои биле и се во иста позиција да донесат одлуки за кои се гонат претходните функционери“, вели Селими.
Аналитичарот Селими смета дека СДСМ со ова раководство и со овој претседател е во сериозен обид да најде изговор да не реагира, наместо да биде проактивно вклучена во креирање на опозициска структура која ќе стави притисок кон Владата да ја изврши работата што подобро, а посебно да одговори што подобро во случајот со трагедијата во Кочани.
„Филипче е еден од луѓето кој на некој начин го носи товарот за случајот со „Модуларната болница“ и оттука моралниот капацитет на Филипче како лидер на најголемата опозициска партија е многу мал за он да може да направи отпорност, да бара отченост и да прави притисок за да имаме непристрасна и транспарентна процедура за пронаоѓање на одговорните лица. За жал СДСМ во моментов е во сериозна криза во однос и со своите партиски членови, но и со граѓаните на Република Македонија. Јас се надевам дека внатре во таа политичка партија кај што има огромен потенцијал на врвни и искусни политичари ќе се изнајде модул таа партија да оживува и да не се однесува ретроактивно кон процесите, туку проативно да придонесе кон креирање на политика, држење на власта под одговорност и притисок да креираат подобри политики.
-Лидерската средба ќе произведува многу повеќе поделби отколку што ќе ги зближува сите страни во нашата држава, а тоа ни е потребно во моментов, посебно од тоа што ќе следи во периодот во однос на геополитичките случувања и на глобално и на регионално ниво. Мицкоски со несериозност им пристапува на меѓуетничките односи во нашата држава и се обидува тоа да го прикрие со вклучување на еден дел од политичките партии во власта, но тоа ќе може да се претвори во сериозен внатрешен предизвик, што ќе не прави послаби во однос на работите што се случуваат кај нас и во светот“, вели за „Трилинг“, аналитичарот Сефер Селими.
Целото интервју погледнете го во видеото.