Венецуела: Спасени 33 лица, десетици илјади сè уште се водат како исчезнати по двојниот земјотрес

Триесет и три лица досега се спасени живи по разорните земјотреси што ја погодија Венецуела, соопшти денеска привремената претседателка на земјата Делси Родригес. Таа наведе дека меѓу спасените има и неколку деца, додека десетици илјади луѓе сè уште се водат како исчезнати, а времето за пронаоѓање преживеани брзо истекува.

Бројот на загинатите во двата последователни земјотреси достигна 1.400 лица, а странски спасувачки тимови се приклучија на операциите за пребарување во најтешко погодената сојузна држава Ла Гуаира.

Семејства и доброволци со денови трагаа по преживеани и извлекуваа тела на загинати од урнатините пред пристигнувањето на повеќе од 1.600 странски спасувачи. Тие честопати се жалеа на недостиг од тешка механизација и на ограничено присуство на државните служби, додека стотици последователни потреси дополнително ја влошуваа состојбата и ги држеа жителите во постојана неизвесност.

Владата предводена од Родригес, која ја презеде функцијата откако нејзиниот претходник беше отстранет за време на американска операција во јануари, им се заблагодари на доброволците што помагаат во Ла Гуаира. Подоцна, властите значително го ограничија пристапот до главниот пат што води кон погодениот регион, со образложение дека интензивниот сообраќај го отежнува движењето на возилата на службите за итни случаи и дека патот можат да го користат само акредитирани лица.

Иако владата соопшти дека стотици лица сè уште се водат како исчезнати или остануваат затрупани под урнатините, на интернет-страница промовирана од политичката опозиција денеска се наведува дека околу 50.000 луѓе се исчезнати. Тоа е помалку во споредба со вчера, кога на списокот имало околу 55.000 имиња.

Американскиот геолошки институт процени дека е можно во двата земјотреси со магнитуда од 7,2 и 7,5 степени да загинале повеќе од 10.000 луѓе, што би ги вброило меѓу најсмртоносните земјотреси во Латинска Америка во последните сто години.

– Постои период од околу три дена, односно 72 часа, по кој веројатноста за пронаоѓање живи луѓе нагло се намалува – изјави Себастијан Огстер, раководител на швајцарскиот спасувачки тим.

Тој рече дека тимот од 80 спасувачи локализирал повеќе живи лица под урнатините благодарение на осум специјално обучени кучиња, но не успеал навреме да стигне до нив и да ги извлече.

Синоќа истекоа критичните 72 часа од двата силни земјотреси.

Швајцарските спасувачи, заедно со останатите меѓународни тимови, ќе проценат кога ќе биде прекината операцијата за потрага по преживеани, изјави Огстер. Тој додаде дека и по завршувањето на спасувачката фаза, тимот ќе остане во Венецуела за да помогне во другите активности за справување со последиците од катастрофата.