Би-Би-Си: Сателитски снимки покажуваат санација на штетата во иранскиот нуклеарен погон Фордо
На вчерашна снимка се гледаат багер и кран на врвот од новиот пристапен пат во близина на местото погодено од таканаречените бункер бомби.
Најновите сателитски снимки од компанијата „Максар Технолоџис“ покажуваат интензивни градежни работи во иранскиот нуклеарен погон Фордо, една од целите на неодамнешните американски воздушни напади.
На вчерашна снимка се гледаат багер и кран на врвот од новиот пристапен пат во близина на местото погодено од таканаречените бункер бомби.
Исто така, наведува Би-Би-Си, забележани се и булдожер и камион, додека дополнителни машини се распоредени на влезот во комплексот и на објекти погодени од израелските напади еден ден по американските бомбардирања.
Според експертот за нуклеарно оружје Дејвид Олбрајт, снимката укажува на можни работи за санација на кратерите, проценка на инженерските штети и земање примероци за радиолошка анализа.
Американскиот претседател, Доналд Трамп, по нападот изјави дека „клучните ирански постројки за збогатување ураниум се уништени“.
Директорот на Меѓународната агенција за атомска енергија (МААЕ), Рафаел Гроси, претходно изјави дека Иран би можел да ги продолжи активностите за збогатување ураниум во рок од неколку месеци.