Белгиските судови нема да ја гонат Фон дер Лајен за набавката на вакцини против Ковид

Белгиските судови нема да разгледуваат жалби против претседателката на Европската комисија Урсула фон дер Лајен во врска со нејзините преговори со производителот на вакцини против Ковид, Фајзер, објавија белгиските медиуми.

Судот во Лиеж ја отфрли жалбата на граѓанинот Фредерик Балдан, кој рече дека Фон дер Лајен треба да биде под истрага за недозволено збогатување, злоупотреба на службената положба и уништување документи од јавно значење. Судот пресуди дека Балдан и уште околу илјада граѓани кои се приклучија на оваа тужба немаат правен интерес во случајот.

Балдан поднесе тужба во 2023 годинa во врска со одбивањето на ЕК да обезбеди пристап до содржината на пораките што ги разменија претседателот на Комисијата и првиот човек на PФајзер, Алберт Бурла, во пресрет на купувањето на 1,8 милијарди дози вакцина за 35 милијарди евра. Комисијата, исто така, го одби пристапот до комуникациите на Омбудсманот на ЕУ.

Балдан неодамна поднесе тужба против шефицата на европското јавно обвинителство, Лаура Ковеси, тврдејќи дека таа се обидува да го прикрие случајот. Ова ново побарување е споено со првобитното и со најновата судска одлука исто така нема да се разгледува.

Минатата година, Судот на правдата на ЕУ пресуди во случајот покренат од европратениците дека ЕК не и обезбеди на јавноста доволен пристап до информации за договорите за купување вакцини. Пред Европскиот суд на правдата се води случај и во врска со тужбата на весникот Њујорк Тајмс за одбиен пристап до содржината на комуникациите меѓу Фон дер Лајен и Бурла.