Бајден подготвува економски санкции – први на удар се руските банки

САД имаат намера да стават на црна листа неколку руски поединци и компании. На нив ќе им биде забрането да тргуваат со Американци и ќе им бидат замрзнати средствата во САД.

Американската администрација подготвува првичен пакет санкции против Русија, што вклучува забрана на американските финансиски институции да обработуваат трансакции на големи руски банки, објавија западни медиуми, повикувајќи се на свои извори.

Станува збор за прелиминарен пакет рестриктивни мерки кои Вашингтон ќе ги применува само во случај на руски напад врз Украина.

Според извештаите на западните медиуми, санкциите имаат за цел да и наштетат на руската економија преку нарушување на меѓубанкарските коресподентски односи, кои се во основата на глобалните парични текови.

САД постојано и се закануваат на Русија со построги санкции. Тие вклучуваат блокирање на Северен поток 2, мерки против рударската индустрија, финансиските институции, државниот долг, исклучувањето од SWIFT и ограничувања на рускиот лидер и неговото опкружување.

Изворите велат дека пакетот може да се промени до последен момент и не е јасно кои ќе бидат метите. Сепак, тие веруваат дека врвните руски финансиски институции, вклучително и ВТБ банка, Сбербанк и Газпромбанк се можни цели.