Америка воведува царини до 3.521 проценти на соларни панели од Југоисточна Азија

Американското министерство за трговија најави воведување царини до 3.521 проценти за увоз на соларни панели од четири земји од Југоисточна Азија – Камбоџа, Тајланд, Малезија и Виетнам. Оваа одлука уследи по истрагата започната минатата година, кога некои од најголемите производители на соларна опрема побараа од тогашната администрација на претседателот Џо Бајден да ги заштити нивните бизниси во САД.

Предложените царини беа воведени како одговор на обвинувањата дека Кина ги субвенционира производителите и наводно исфрла неправедно евтини производи на американскиот пазар. Одлуката за конечните царини ќе ја донесе американската меѓународна трговска комисија во јуни.

Станува збор за компензаторни и антидампинг давачки кои варираат во зависност од производителот и земјата на потекло на производот. Некои извозници од Камбоџа се соочуваат со највисоки царини, до 3.521 проценти, поради, според Министерството за трговија, недостаток на соработка во текот на истрагата.

Спротивно на тоа, соларните панели произведени во Малезија од кинеската Jinko Solar подлежат на меѓу најниските тарифи, нешто повеќе од 41 отсто. Друг кинески производител, Trina Solar, се соочува со царина од 375 проценти за производите што ги произведува во Тајланд.

Двете компании одбија да го коментираат случајот за Би-Би-Си.

Во последниве години, многу кинески компании го преселија производството во Југоисточна Азија за да ги избегнат царините наметнати од Трамп на почетокот на неговиот прв претседателски мандат. Најновите наоди од Министерството за трговија беа поздравени и од Комитетот за трговија на Американската алијанса за производство на соларна енергија, група американски производители кои побараа истрага.

„Ова е одлучувачка победа за американската индустрија и потврда на она што долго време го расправавме: дека кинеските соларни компании го мамат системот“, рече Тим Брајтбил, главен правен советник на организацијата. Во текот на 2023 година, САД увезле соларна опрема во вредност од речиси 12 милијарди долари (околу 11,2 милијарди евра) од четири азиски земји, покажуваат податоците на американското биро за статистика.

Иако тарифите ќе им помогнат на домашните производители, тие исто така може да доведат до повисоки трошоци за бизнисите и потрошувачите кои имаат корист од поевтината соларна технологија. Новите мерки се воведуваат покрај постојните царини што претходно ги наметна администрацијата на Трамп.

Најавата доаѓа само неколку дена откако кинескиот претседател Си Џинпинг ги посети Виетнам, Малезија и Камбоџа во обид да ги зајакне врските со регионот и да ги повика тие земји да се спротивстават на, како што рече, „едностраното малтретирање“ од страна на САД.

Трамп досега воведе царини до 145 отсто за кинескиот увоз, а сите други земји во моментов подлежат на сеопфатна царина од 10 отсто, која останува на сила до јули. Неговата администрација минатата недела објави дека вкупните царини за некои кинески производи, кога ќе се спојат постоечките и новите, може да достигнат 245 проценти.

Кина одговори со царина од 125 отсто за американските производи и рече дека „ќе се бори до крај“.