Албанија на брза лента кон ЕУ – на 16 септември ќе ја одржи следната меѓувладина конференција

Албанскиот премиер Еди Рама објави дека на 16 септември, Албанија ќе ја одржи следната меѓувладина конференција со Европската унија.

Во објава на Фејсбук тој оценува дека ова е „важен чекор за Албанија кон нејзиниот пат кон членство во Европската Унија”.

Тој додаде дека на следната меѓувладина конференција со ЕУ се очекува да бидат отворени 4 нови поглавја од преговорите, со што вкупниот број на отворени поглавја ќе достигне 28 во рок од само 11 месеци.

„Албанија не застанува. Во вторник, 16 септември, данското претседателство со ЕУ нè поканува, во присуство на министрите за надворешни работи на сите земји-членки, да отвориме уште 4 поглавја од преговорите за пристапување, кои се надополнуваат на 24-те поглавја што ги отворивме за само 11 месеци – апсолутен рекорд за брзината на преговарачкиот процес”, стои во објавата.

Додава дека темите што ќе бидат разгледани вклучуваат неколку важни области.

„Зелената агенда и одржливата поврзаност, во области од витално значење, како што се транспортот, енергетиката, трансевропските мрежи и животната средина, сега се на маса. Вграден уште еден километарски камен на патот кон врвовите на Албанија во ЕУ во 2030 година“, пишува Рама.

Според најавата, отворањето на поглавјата ќе заврши на 2 октомври со меѓувладината конференција каде што ќе биде отворена и последната група поглавја, онаа „Земјоделство и кохезија“.

Амбицијата на владата е Албанија да стане полноправна членка до 2030 година, но, како што неодамна изјави комесарката за проширување, Марта Кос, таа е оптимистка во врска со членството на земјата до 2029 година.