Фронтекс: Речиси 110.000 мигранти влегле нелегално во ЕУ оваа година

Бројот на нелегални преминувања во Европската унија е намален за 29 отсто во првите 10 месеци од 2026 година, во споредба со истиот период минатата година, соопшти европската гранична агенција Фронтекс. Агенцијата, чие седиште е во Варшава, регистрирала речиси 110.000 преминувања на границата во текот на тој период.

Бројките се намалени на речиси сите мигрантски рути, а европскиот комесар за миграции, Магнус Брунер, ова намалување го припишува на зајакнатата меѓународна соработка.

„Намалувањето на нелегалната имиграција во Европската унија е резултат на континуирана работа и поголема стабилност во клучните региони“, изјави Брунер за германските медиуми претходно оваа недела. „Зад ова стојат реформи, меѓународни договори и заеднички мерки со нашите партнерски земји долж мигрантските рути.“

Најголем пад е забележан на рутата преку централниот Медитеран, помеѓу Северна Африка и Италија. Најголем број нелегални влезови во ЕУ, речиси 60 отсто, се случуваат преку источниот Медитеран. Сепак, и таму бројките се намалуваат, за околу 12 отсто.

Спротивен тренд е забележан во западниот Медитеран, каде што има зголемување од 21 отсто во споредба со 2025 година. Промените се особено изразени на западноафриканската рута, долж атлантскиот брег кон шпанските Канарски Острови.

На оваа рута, нелегалните преминувања се намалиле за 13 отсто во истиот период, но вкупниот пад бил прикриен од наглото зголемување во октомври, кога бројот на преминувања бил четири пати поголем од оној регистриран во октомври 2025 година.

Обидите да се стигне до Европа со небезбедни пловни објекти често завршуваат трагично. Според Меѓународната организација за миграции (ИОМ), само оваа година повеќе од 2.000 луѓе ги загубиле животите во Средоземното Море.