Американскиот претседател Доналд Трамп изјави дека ќе го разгледа новиот мировен предлог на Техеран, но веднаш изрази сомнежи за неговите перспективи, велејќи дека Иран сè уште не „платил доволно висока цена“.
Две полуофицијални ирански новински агенции, Тасним и Фарс, за кои се верува дека се блиски до Револуционерната гарда, објавија дека Иран им испратил на Соединетите Држави нов предлог од 14 точки преку Пакистан.
„Ќе известам за тоа подоцна“, рече Трамп за предлогот пред да се качи во претседателскиот авион, додавајќи дека „сега ќе му го достават точниот текст“.
Кратко по разговорот со новинарите, Трамп го коментираше новиот предлог на социјалните мрежи, пишувајќи дека „не може да замисли дека би бил прифатлив со оглед на тоа што сè уште не платиле доволно висока цена за она што го направиле на човештвото и светот во последните 47 години“.
На Трамп му беше поставено и прашањето зошто САД ги повлекуваат трупите од Германија?
„Драстично ќе го намалиме бројот и ќе одиме многу подалеку од 5.000“, рече тој.
Трамп го отфрли претходниот ирански предлог претходно оваа недела. Сепак, прекинот на огнот во војната – инициран од САД и Израел кон крајот на февруари – е во сила од 8 април, а една неуспешна рунда мировни преговори веќе е одржана во Пакистан.
Иранскиот заменик-министер за надворешни работи, Казем Гарибабади, им рече на дипломатите во Техеран дека „топката е во дворот на САД да го изберат патот на дипломатијата или да продолжат со конфронтациски пристап“. Иран, рече тој, е „подготвен за двете опции“.
Вашингтон постојано повторува дека нема да ја заврши војната без договор што би го спречил Иран да развива нуклеарно оружје, што беше главната цел што ја наведе Трамп кога ги започна нападите во средината на нуклеарните разговори во февруари. Иран, од друга страна, вели дека неговата нуклеарна програма е исклучиво мирна.
Според Ројтерс и други агенции, Техеран предлага повторно да се отвори Ормутскиот теснец пред да се решат нуклеарните проблеми. Иранските медиуми објавија дека најновиот предлог од 14 точки вклучува повлекување на американските сили од областа околу Иран, укинување на американската блокада на теснецот, ослободување на замрзнатите ирански средства и исплата на компензација.
Предлогот, исто така, повикува на укинување на санкциите, крај на војната на сите фронтови, вклучително и Либан, и воспоставување нов механизам за контрола на теснецот.
Зборувајќи вчера во Флорида, Трамп посочи дека новата воена акција против Иран е сè уште опција. „Ако се однесуваат лошо, ако направат нешто лошо… засега ќе видиме“, рече тој. „Но, тоа е можност што сигурно може да се случи“.
Од друга страна, САД ги предупредија превозните компании дека би можеле да се соочат со санкции ако му платат на Иран за безбеден премин низ Ормутскиот теснец. Од почетокот на војната, Иран одржува строга контрола врз теснецот, нарушувајќи ги клучните текови на нафта, гас и ѓубрива кон светската економија, што ги зголеми цените на нафтата за околу 50 проценти од нивоата пред војната. САД одговорија со поморска блокада на иранските пристаништа за да ги спречат приходите од нафта на Техеран.
Предупредувањето издадено од САД во петокот се однесува не само на плаќањата во готово, туку и на „дигиталните средства, компензацијата, неформалните размени или други плаќања во натура“, вклучувајќи ги и добротворните донации и плаќањата во иранските амбасади.