Центар за поддршка на лица со дијабетес ќе биде отворен денеска во Скопје за којшто БАЛАНС МК – Асоцијација за детски дијабетес на Македонија доби просторија преку јавен повик на Град Скопје.
– Проектната апликација на БАЛАНС МК – Асоцијација за детски дијабетес на Македонија е меѓу највисоко оценетите и одобрена од Градот, при што е обезбеден и соодветен простор за негова реализација, информираа од БАЛАНС МК во најавата за отворање на канцеларијата на Центарот.
Целта на проектот е воспоставување континуиран, локално достапен сервис за поддршка, советување, организирање едукативни работилници како и психо-социјална поддршка на лица со дијабетес и нивните семејства на територија на Град Скопје и пошироко, со акцент на подобрување на самоконтролата, превенција на компликации и унапредување на квалитетот на живот.